احمدپٹیل اور آنند شرما نے تہاڑ میں شیو کمار سے ملاقات کی

نئی دہلی، 26 ستمبر , کانگریس کے سینئر لیڈر احمد پٹیل اور آنند شرما نے جمعرات کو تہاڑ جیل میں عدالتی حراست میں قید پارٹی کے کرناٹک سے لیڈر ڈی کے شیو کمار سے ملاقات کی۔
مسٹر شیو کمار منی لانڈرنگ کیس میں گرفتار کئے گئے تھے۔ راؤز ایونیو میں واقع ایک اسپیشل کورٹ نے بدھ کو مسٹر شیو کمار کی ضمانت کی درخواست مسترد کر دی تھی۔انفورسمنٹ ڈائرکٹوریٹ (ای ڈی نے ان کے خلاف منی لانڈرنگ کا معاملہ درج کیا ہے۔ مسٹر پٹیل اور مسٹر شرما کے ساتھ کرناٹک کانگریس کے لیڈر ڈی کے سریش بھی تھے۔
قابل غور ہے کہ کانگریس کے سینئر لیڈر اور سابق مرکزی وزیر خزانہ پی چدمبرم بھی آئی این ایکس میڈیا معاملہ میں تہاڑ جیل میں ہی عدالتی حراست میں ہیں۔ پیر کو کانگریس کی عبوری صدر سونیا گاندھی اور سابق وزیر اعظم منموہن سنگھ چدمبرم سے ملاقات کرنے تہاڑ جیل گئے تھے۔ راجیہ سبھا میں حزب اختلاف کے رہنما غلام نبی آزاد بھی چدمبرم سے ملنے بدھ کو تہاڑ جیل گئے تھے۔